UDHA

Më 5 dhjetor, në sallën CM13 të Universitetit Federal Politeknik të Lozanës, do të shfaqet dokumentari “Udha – Një gjak, një gjuhë, një besë”, në praninë e autorëve dhe protagonistëve të tij, Lorik Cana dhe Arbër Agalliu. Të ftuarit do të prezantojnë dokumentarin, do të ndajnë përvojën e tyre gjatë xhirimeve dhe do të marrin pjesë në një diskutim me publikun pas shfaqjes.

Dokumentari “Udha” trajton historinë dhe kulturën e komuniteteve arbëreshe në Itali, pasardhës të shqiptarëve që u vendosën atje mbi pesë shekuj më parë. Filmi ndjek udhëtimin e Lorik Canës dhe Arbër Agalliut nëpër fshatra arbëreshe të Siçilisë dhe Kalabrisë, ku ata eksplorojnë gjuhën arbëreshe, traditat, besimet dhe mënyrën e jetesës së këtyre komuniteteve.

Ky është një aktivitet i rrallë kulturor që ofron mundësinë për të njohur më afër një trashëgimi të çmuar historike dhe identitare.Organizimi eshtë berë në bashkëpunim me Albinfo, Lorik Cana 5 Foundation, Swiss Albania Events, SMZH dhe AEAUL (Association des Etudiants Albanais des Universités de Lausanne).

Hyrja është falas, por vendet janë të kufizuara. Prandaj rekomandojmë rezervimin dhe mbërritjen në kohë.